老馬發火,非同小可~ 《老馬有種》觀後感~

多謝We Share, 令我有機會參與今年既Cine Fan夏日國際電影節2014

更有機會重溫一代意國情聖 馬斯杜安尼 (Marcello Mastroianni) 的最後遺作~
《Sostiene Pereira》
《老馬有種》


馬斯杜安尼於一九九六年逝世,而呢部片就是拍於一九九五年
影片的時代大約為一九三六年的葡萄牙裏斯本,鄰居西班牙的內戰如火如荼,葡萄牙表面平安無事、獨立自主,其實法西斯獨裁魔爪已逐漸從內部伸出來~
 
 
馬斯杜安尼係劇入面飾演一個不問世事,只談風月的文化版編輯。因為老婆早逝, 於是放縱飲食,搞到身體日差, 老態畢現,成日只關心死左會點。
 
直到佢認識左一個年輕人Monteiro,Pereira發覺Monteiro對描寫死亡有獨特的見解,便邀請他為文化版預先撰寫年老文豪的訃文,到他們真的離世時便可立即刊登。可是Monteiro交回來的訃文,帶有強烈的反法西斯主張,Pereira深知這種文筆一定不容於審查機關,但愛才的他還是願意預支薪水給Monteiro。共和派於西班牙內戰失利,Monteiro捨身參與,自然惹來葡萄牙秘密警察的追捕。Pereira捲入其中
 
 
故事以順序既形式敍述,由年老的Pereira 認識Monteiro後, 再經過和不同人既對話和身邊發生既事, 令到Pereira 由一個只關心自身, 極力避開政治既人,最終都明白到沉默只會換來沉重既代價。
 
故事中穿插既人都唔少,有待應,有神父,有醫生,有管家婆。
不過每一個都係戲入面都有一定既作用~而且敍述有致~
 
一開場既安東尼神父,就表達左作者既主觀願望。
對於不聞不問, 只係關心自己既人極度憎惡,甚至同佢講多幾句都唔想~
到後來年老的Pereira 終於明白而有所改變時, 佢就變得親切近人。
 
 
而另一個重要既角色就係劇入面既醫生。 Dr. Cardoso, Daniel Auteuil以輕鬆既手法,演繹一個亦師亦友,不論身體同心靈都擔當住治療者既角色。而佢係最後都係事件成功既關鍵者~
 
而兩者幽默既演繹令到沉重既故事有一D喘息既機會~

 
Monteiro的死亡,令Pereira終於意識到逃避並唔係有用既方法,佢利用傳媒既身份,不顧一切去公開 葡萄牙秘密警察的惡行,最後輕身上路,離開自己呢個自以為既安樂窩~, 因為心態既改變,連隨步履都輕盈左,說明人生有希望,定當活得自在開心~
 
 
一開始我就介紹左故事背景,因為缺乏西史認知既我加上大量既詩人名同全英文字幕,對於理解成個故事既細節的確有打折扣。不過整套戲既理念很清楚,就是我們不要做沉默的一群,你不找政治,他最終會找上你,所以在有能力時就要盡力去爭取。

  故事雖然發生遠在一九三六年的葡萄牙裏斯本, 但同今日既香港氣氛真係好似~
傳媒被淪為政治既工具,只作出有利我方既報導,企圖蒙蔽小市民,就好似戲中既政府不斷播放一段和平安泰既短片蒙蔽自己既國民。
 
作為香港市民,我痛心既唔係無得選特首,亦唔係打壓佔中,我痛心既係標榜自由,開放既社會, 但往往會出現一D打壓或者為利益而偏頗既報導。
 
傳媒已經成為左某種人既喉舌,報導只偏向自己有利既一方。
 
當口口聲聲話要新聞自由既同時, 完全所謂既自由只係利益既包裝。
邊度有利益就報導D咩~
可悲~
 
 
 
 
 呢位曾奪威尼斯電影節最佳男演員獎、康城影展影帝及三度入圍奧斯卡金像獎最佳男主角馬斯杜安尼 (Marcello Mastroianni) 將老年人既遲暮演繹得入木三分, 在戲中,我已忘記了他曾是一位風流瀟洒,傾倒眾生的情聖。
 
讓我在這裏懷念一下這個一代 <<意國情聖>> 。亦惦念一下慢慢死去既香港
 
以上活動由WESHARE 的邀請~
Cine Fan夏日國際電影節 2014 x WESHARE活動
 
如要聯絡本人,請電郵至: smonkichi@hotmail.com
 

 

 

留言

這個網誌中的熱門文章

灰甲小知識 ~ Emtrix®安甲適®

帶女女徹底驗眼 ~ 理大護眼中心

輕輕鬆鬆踢走肚腩~ 【Kakki 活気-腹周燃燒 EX 錠】