選擇困難症又發作~

荃灣真係好少去 ,剩係識得千色店~ 
今晚入黎搵朋友,一齊去左呢間自助餐
貪佢夠平,可以坐2個鐘,仲好多野揀


韓日燒自助餐


聽個名已經知,呢度有韓食,日本野,仲有得燒添~

七點半上到黎,唔知係咪星期一,仲有好多吉位~
呢度真係堅大,仲有唔少卡位~



每個卡位上面都有一個抽油煙機,一個燒爐~同埋一個電磁爐~(用黎打邊爐架) 



當日無咩人,所以無爭野食既場面,D食物都放得好得靚仔下~
唯一係無野蓋住,有少少感覺唔太衛生 (希望D人自律,唔好對住D野食打乞嚏啦~)

另一邊就有條長長的迴轉壽司,好有驚喜喎~ 
仲有一個鐵板橈添~  仲有一個打邊爐的角落,好多菜,麵食,D菜仲好新鮮添~


除左食,估唔到飲品都好多選擇,最堅係有一個酒角,有好多唔知係咪自釀既酒,堅呀~


就算連調味料架都好有誠意,超多款~ 


巡左一個圈,已經有D頭暈,我既選擇困難症又發作~因為實在太多野食揀啦~@@

店員推介呢個蕃薯俾我~
蕃薯本身已經好淋好甜,加埋個特制甜醬,可以當甜品~  好新鮮的食法~ 


呢個又係店員推介,慢煮秋刀魚
魚味好濃,雖然無熱食咁香口,但亦有很濃的魚味
當然,凍食有少少魚腥味,加埋D鹽一齊食就可以去除腥味~ 


再黎一個慢煮牛
加埋芥未醬,牛嫩滑,牛味都好濃~ 望落似生生地,但食落口反而無生牛肉的感覺
好有驚喜的一道菜~


蔥花三文魚腩,不過不失,飯有少實,但紫菜新鮮唔韌~


刺身的蝦雖然蝦味唔太濃,但都爽口彈牙~


燒肉方面,D肉都切得好薄,方便燒,
豬頸肉好爽,牛柳粒好嫩,
肉雖然都係雪, 但唔會雪到實的的~又唔會溶到出哂水~
溶解得啱啱好


店員教我地整呢個
蔥花鵝腸
先煮熟鵝腸,加蔥花,再加醬炒埋
真係好正,好有大排檔風味~ 
我地食左2轉~ (食飽左~@@) 


仲有另一個好味既雞腎,燒完後好爽口,調味又美味~ 


呢度最方便的一個發明,自換牛油紙~ 唔使下下等人黎換盤,又方便~又唔會咁易燒燶野~ 
十個讚呀~~



燒完野後,當然要黎個邊爐~


個四川麻辣湯底真係錯,好有水準,不過記得要加水呀~因為都幾濃味~

用呢個湯底黎煮菜食,我地又食左3 ROUND菜~

入席前已見鐵板燒司傳係度燒,但點解次次燒完都唔見哂
原來要用咭去拎,同師傳講,佢就會燒完拎俾你~

呢個牛油元貝,元貝其實好細粒,不過勁重牛油味,好香味,食2個後有少少溜添~


我地仲攞左刺身的蝦黎,估唔到都幾好味,D蝦比生食時更加爽~ 大家可以試下呀~


成晚又燒,又刺身,又打邊爐,好鬼忙,不過又好滿足~



呢度本黎仲有唔少甜品~但因為食得太飽啦~已經食唔落了~@@



呢度一次過可以食到韓,日,仲有打邊爐,啱哂多心既香港人~ 
其實以百幾蚊黎食BUFFET ,本黎都唔敢抱咩期望~
不過無期望,反而有驚喜~
最重要係唔係食垃圾,食物都有咁上下水準,就算連一杯酸梅湯好好飲,都唔會稀到無味~!


韓日燒
荃灣沙咀道298號翡翠廣場2樓

如要聯絡本人,請電郵至: smonkichi@hotmail.com





SKIN CARE

Make Up

Food

親子