豬手 on the fire ~ February

唔經唔覺又到 3月尾
阿囡又到測驗週
溫左成個星期書,一測完驗,當然要帶佢去食番餐慶祝下


這間位於官塘海日昇中心2樓的餐廳,地理上係有少少偏
要先入商場,再乘扶手電梯先到
(搭LIFT 係去唔到架) 

因為係吧,所以燈光都比較暗
掛上了好多富民族色彩的燈~


基本上以四人枱為主
另一邊有個角落可以坐一家大細好多人
(有人用餐中,唔好意思影)


呢度仲有得睇波同任飲惠優 HKD 120/位
仲有特價小食


當然,仲有唔使煩的SET DINNER (2人套餐)

2人餐都幾經豐
有沙律/湯/主菜/意粉/飲品/甜品拼盤


一家3口,叫左個2人套餐

先來個是日餐場,磨菇湯


湯比較稀,入面都有唔少菇粒


不過味道非常濃,似乎重手左~

呢個鮮雜果蔬菜沙律正呀
賣相已經好吸精~明顯係落過心機架~


入面除左有菜外,仲有蜜瓜,桃,粟米,提子,而且生果仲好新鮮~ 
啱哂唔食菜的女女,佢揀哂D生果黎食~@@
沙律醬應該係餐廳自己較過,味道偏淡,而且份量又唔太多
未能做到調味的作用。

黎啦黎啦~
呢個就係晚餐D既德國火焰咸豬手拼德國腸~
我見枱枱都有點架~
待應會係你面前淋上一杯野(我估係酒黎)
跟住點火,就造到呢個咁型既效果
張張枱都舉機係咁拍,影相呃LIKE呀~


玩完影完,待應都會幫我地拎入去技術切割啦~
呢隻豬手,真係超級大,老實講,2個人真係食唔哂~


佢D皮有D似燒豬皮咁,薄薄地,唔太肥
唔算好爆脆,但都唔韌~


豬手肉都幾滑,食落又唔會好痴牙
最重要係唔太咸,就咁食都OK,唔使咸到要送飯


配角的德國腸都唔錯,腸肉唔會淋PAT PAT, 而且有香草味
無咩黑椒同唔辣,阿女都食到~


不過3條腸既味道同質感都一樣,有少少悶
其中一條改下做其他腸會好D~


意大利肉丸伴尖通粉


肉丸唔係彈牙個隻,有少少淋身,不過有香香的香草味
意粉控制唔錯,唔會過淋過硬


個蕃茄汁有D偏甜,唔夠酸,啱阿女食~XD 

呢度跟既餐飲,叫左2杯可樂
超超超超超大杯呀,覺得好抵飲~XD 


食飽飽,都八點幾九點,諗住快手食埋個甜品閃
點知等左十分鐘都未到,甜品都係凍櫃拎出黎架啫?~

一上枱,原來,甜品係咁豐富架~
除左4粒雪糕糯米滋,一杯慕絲, 一杯啫喱
仲有一個心太軟呀~
真係等下都抵~


雪糕糯米滋,一貫的好味
兩杯甜品,味道算會太甜
心太軟,朱古力醬好香濃,外層蛋糕同樣香~


呢度既2人餐份量都唔少,我地一家3口都唔哂
豬手係做唔得唔錯,有gimmick 亦有味道
湯/意粉就仲有進步的空間
甜品算係意外的驚喜吧~

February
觀塘駿業街56號中海日升中心2樓A號舖


如要聯絡本人,請電郵至: smonkichi@hotmail.com


留言

這個網誌中的熱門文章

灰甲小知識 ~ Emtrix®安甲適®

帶女女徹底驗眼 ~ 理大護眼中心

輕輕鬆鬆踢走肚腩~ 【Kakki 活気-腹周燃燒 EX 錠】