天寒地凍煲一煲~
寒流襲港, 最好的選擇當然係去打邊爐啦~
去左近旺角火車站既汀汀烤活魚
好平民的設計,當然啱哂我呢D平民啦~XD
不過太肥的平民就有少少煩,因為座位都實在有少少迫,出現椅背互貼的情況~
雖然話係烤活魚店,當然都有其他正野既
今晚我就點左佢
~羔蟹雞煲~
雞煲SIZE都唔細,入面有成隻羔蟹,雞就唔知有冇一隻啦,因為係碎上。
初上枱時見煲野好似都熟哂咁
不過店員話九成熟,要等佢再滾一滾,滾番起佢先~
滾到咁上下,店員就好好人咁幫我地搞勻D菜~
起筷啦~
今次叫麻辣的小辣,不過初入口辣味都算重,如果唔食得辣既朋友最好叫微辣啦~
而且因為係煮住食,D辣味仲越食越出,會越黎越辣添~
雞大多都係痴骨位,所以都好滑~
店員教食個時先食快熟的細舊先~
雞煮得耐肉都會變嚡,所以要快手食~
蟹嘛,真係唔錯,吸左D辣味,但仲食到D蟹好新鮮~
食到尾時,D味好濃,有少少過咸
所以快手食哂D餸後,店員幫我地加湯,變左個勁正既湯底~
其實食完個雞煲都飽左一大半,所以餸就叫左唔係咁多~
咁叫少D,當然要叫好D
叫左尼個安格斯牛 (大)
話大,其實都唔係好大,相入面就大約1/4既份量
( 食得太開心,唔記得左影相~XD)
牛係好滑,雪花紋好靚, 淥幾下就食得,完全唔UN, 亦無根唔嚡~ 果然貴得有得道理~
不過唔知係咪用麻辣湯底煮,無乜牛味~
呢個豚肉同麻辣湯底好夾
雖然無安格斯牛咁滑
但肉味濃D,有咬口D,絕配呀~
而且冰鮮得黎唔會雪到硬繃繃,好似新鮮軟軟的肉質呀~
食左韮菜餸同水餃
開頭見D價錢都係32蚊,覺得都唔貴
,不過原來32蚊得4隻~ 好彩我地4個人,啱啱夠分
呢度既餃子唔知係咪自己包呢~(雖然我覺得都係來貨)
不過質素真係唔錯
皮唔會好易煮爛到一PAT PAT
入面D肉同菜都分明,唔係將D肉同菜搞爛個D成一團肉個D
真心講,依家好食的餃子真係唔易搵到~
呢度餃子算係好質素的~
再黎就係呢個,鬼馬油炸鬼~
油炸鬼加入左D 蝦膠, 店員話可以放入湯度拖幾下食~
不過個人對呢個餸就麻麻,感覺同打邊爐九唔搭八咁
就算沾湯食都唔覺有咩咁特別~
打邊爐當然要菜啦~尤其係我最愛的皇帝菜,用黎吸哂湯的味道就最正~
不過出街幾十蚊食個菜,其實幾貴架~XD
呢度都有唔少熟食,我叫左網上都好多人都有叫的蒸茄子
茄子加上左孜然粉,好香口~ 不過個皮有D硬,扣左少少分~
呢度的食材感覺都幾新鮮,打邊爐,食材真係幾緊要架~
雖然係旺角,門口都有人等位,不過無限時,店員亦無趕人走
仲會幫我地換碟添~
打邊爐,有得慢慢坐,慢慢傾,真係好緊要架~~
汀汀烤活魚
旺角染布房街13A-B地下C舖
如要聯絡本人,請電郵至: smonkichi@hotmail.com
Fanpge : www.facebook.com/smonkich
Instagram : https://instagram.com/smonkichi/
留言
張貼留言