抵食又美味的機械人餐廳~ 煮道 UNIBOIL
是日同朋友過大海去睇 LV. 難得過海，就同囡囡黎呢度食個飯
煮道 UNIBOIL
呢間野，走韓風路線，裝修簡潔，地方很寬敞
不過，佢係食火鍋的~ 係好似SABU SABU 的一人一鍋~
佢既鍋選擇都好多同好有特色架~
最搞笑全丸鍋，真係食丸食到傻呀~XD
火鍋的肉好緊要，呢度既牛肉，都係有名堂的~
如果唔食牛，豬/羊都好有特色的~
最特別係，佢有勁多湯底俾你揀
真係勁多呀~ 款款都好有特色~
步隊鍋湯底/ 南瓜湯底/ 蕃茄湯/泰式冬蔭湯/日式壽喜/粟米湯底~
之前係朋友既FACEBOOK 見到呢間餐廳後，就好想帶囡囡黎啦~
因為佢囉~
呢度有個好得意既既送餐機械人架~
個個鍋都係由佢送出黎的~
佢側邊有個SENSER ，去到你個位就識自動停落黎架啦~ 好叻叻豬呀~
佢一路行仲會一路講野
而且，仲識變唔同樣架~
在場既小朋友見到佢都不知幾開心，
每次出場，我囡都眼定定，睇下佢去邊度~
店主仲好好人咁會整停個機械人俾大家影相架~
是日，我叫左個星級精選鍋 加粟米湯底~
HKD 98
牛肉色澤好靚，雖然唔係好多雪花，但唔會成舊肥牛咁~
切得好薄，碌兩下就熟啦~
肉質好嫩滑，而且就算碌到熟哂，都唔會韌~
開始望落，點解個湯咁清，原來D粟米收埋哂係底
呢個，似係平時買既罐頭粟米湯，好清，
店無整到好咸，好有住家FEEL ~
除左肉外，入面既丸全部都用上振興肉丸，唔怪得咁好食
有花枝丸，魚蛋小籠包，牛丸，全部好好食，粒粒都唔同
仲有呢個黃金枝豆棗，入面既漿好得意，唔知係咪枝豆黎~
仲有呢個振興特別為煮道整既福寶，有煮道個公仔樣個度架
每個鍋都有跟一個飯 (其實食完個鍋都飽左)~@@
飯有D似越南米，好硬身，就咁食我覺得有D硬，加埋個湯食就好好多~
朋友叫左另一個日式壽喜鍋~
HKD98
食物同我地個鍋大同小異，但湯底改左壽喜湯底 (好似醬油湯底)
同埋丸少左，多左個烏冬~
食落都幾有日式風味
烏冬幾滑，湯底都會好咸~
幾鐘意呢度既火鍋爐，夠大個，好穩陣~ 唔怕小朋友會推倒
雖然都幾阻地方，不過好彩佢張枱都夠大)
而且火力都幾強勁，一路滾住食，冬天一流呀~
呢個壽喜鍋都有跟一個飯架，但實在太多了，我地叫佢唔好上，唔好浪費嘛~
每個餐都跟一杯飲品架
SIZE 都幾勁 ~ 但味道唔會好死甜
紅色的洛神花茶味道較濃
白色的青檸梳打則較清新
不過每杯既冰都唔少，下次要記得叫佢少冰先~
最後，要提下呢個調味架
個麻辣醬都幾勁料架~ 堅辣架~!
沙嗲醬唔太辣，但好香~
老實講，初初冒名而來都係因為個機械人
同埋價錢又唔係貴，都無抱咩期望
但估唔到食物用料好足，而且材料都靚
一百蚊一個餐，加埋個咁得意既機械人，真係超值呀~
下次帶小朋友去中上環遊，不妨黎呢度食個機械人餐呀~ 小朋友一定好開心架~
煮道 Uniboil
上環皇后大道西2-12 號百匯電腦城1樓A區
如要聯絡本人，請電郵至： smonkichi@hotmail.com
Fanpge : www.facebook.com/smonkich
Instagram : https://instagram.com/smonkichi/
留言
張貼留言