有預算的蒸海鮮套餐~潮福蒸氣石鍋
當日約左係尖沙咀返工的朋友食飯
估唔到係尖沙咀都有潮福分店，咁就去呢度啦~
厚福街呢間其實開左幾耐？真係唔知，不過佢既格局好似開左好多年既舊式酒樓咁~
因為有好多海鮮真係唔知咩黎~，所以海鮮係放哂係度俾大家睇左先再落單
當然，仲可以睇下係咪新鮮嘛~
黎呢度係既第2個理由係有個半任食套餐
以時段計，最平都係298一位，以食海鮮黎計真係好抵~
自助調味料有好多唔同醬料可以自己混醬
不過當晚食八點場，D蒽同芫茜已經見哂底了~
套餐仲有啤酒，汽水同竹庶水任飲
呢個竹庶水清清地，唔係好濃，不過好夠凍，又唔太甜~幾啱用黎食海鮮~
套餐係包每人一個湯
我地2個人，揀哂2款湯~
西洋菜燉唐排
雲腿粒冬瓜燉海螺湯
燉湯黎講呢2款唔係好濃個隻。
西洋菜湯既菜味好濃郁，而冬瓜就較清甜
最好係個湯唔肥膩，清清地，好有住家靚湯FEEL~
套餐包一個粥底
有新鮮排骨同瑤柱鮮淮山
我地揀左瑤柱鮮淮山
估唔到2個人既份量都有成碗米咁多~@@
之後就可以蓋實佢再係上面蒸海鮮啦~
套餐有2個海鮮定食
南非龍蝦
龍蝦係每人包半隻, 睇到好新鮮，仲好大隻，蒸出黎既肉質勁爽脆~
另一個定食係貝殼盛盤
是晚有番薯蜆 同北寄貝
蕃薯蜆就麻麻鐘意，D肉唔係爽甜，淋淋的。有一隻仲係壞左
不過北寄貝就OK，平時都係食刺身多，今次第一次食熟既
估唔到肉質好爽口~ 仲多左生食無既鮮甜味
套餐包括左 每枱可揀指定五款海鮮 (每人一隻)
鮑魚：必食，新甜嫩滑，蒸到啱啱好，唔會韌
象牙蚌仔：呢隻又係我既新竉，好爽口~
象拔蚌仔：呢個真係唔LIKE, 我覺得好腥 (雖然同行朋友話正常)
不過我自己就頂唔順個陣味，最後俾朋友食埋~
再黎個頂級大元貝~
蒸到真的剛剛熟，嫩到不得了
完全唔痴牙，亦都無沙無腥味~
雖然海鮮有限定，不過肉食同瓜菜類就任食的~
蒸肥牛，牛肉真係肥
而且仲好多油，食落口真係啖啖牛油，頂唔緊~
瓜菜類就好好多，全部清蒸，無加任何調味~ 勝瓜夠清，粟米甜，皮唔韌。
污糟雞同豬頸肉
污糟雞有醃過，很野味, 不過蒸耐左少少，有少少嚡左
豬頸肉雖然無肥牛咁多肥膏，但食入口都係好多油~
鯪魚球同豬肉丸
肉丸好彈牙，似自家製，滿口都係肉黎，唔係街成口粉個D丸
豬肉丸入面仲夾有梅菜添，好得意
蟲草雞有調味 但無污糟雞咁重味，雞肉以痴骨部份較多，所以亦較滑
(如果鐘意食啖淡肉既就可能覺得麻煩)
紅棗糕，第一次蒸呢D糕點，估唔到俾預期出色
糕好煙韌，亦很清甜唔會死甜~
蒸完一大輪，個粥出場了
(其實已經飽左九成)
個粥底其實偏杰，姐姐話加水幫我地再煮多陣，不過其實已經好多 (2 人份黎計)
所以我地無再加水就咁食
米已經煲到好綿，個粥有好多味道，唔使加野落去已經好夠味~
食蒸野真係唔可以少左呢一環~
飯後仲送黎清甜的西瓜，讚~
係OPENRICE見好多人都話呢間既服務好差
但當日遇到的服務員都超好人
有個似經埋的伯伯成日問我地夠唔夠食，好似怕餓親我地咁~HAHA
幫手蒸野的姐姐都好細心，每次都好有耐性地等我地影哂相先冚蓋或者分餸
換碟又換得好密，差唔多食完一, 兩道餸就換一個碟
最初去潮福食真係幾貴，落ORDER都要就住就住
有左呢個套餐後，真係食得好盡慶，係咁食唔使再理價錢，FREE好多~
註：套餐價錢需另加一服務費及15蚊茶芥
星期六/ 日及公眾假期另加每位50蚊~
潮福蒸氣石鍋
尖沙咀厚福街5-6號多富閣1樓
如要聯絡本人，請電郵至： smonkichi@hotmail.com
Fanpge : www.facebook.com/smonkich
Instagram : https://instagram.com/smonkichi/
留言
張貼留言