親子酒店式BUFFET ~ 日．悅 極尚日式放題
和朋友約食飯，約了一段時間
大家都要湊小朋友，平日放工好難就
終於約到係新年前聚一聚
大家住得天東地北的
最好的聚腳點，就選了尖東
日．悅 極尚日式放題
位於半島中心的2樓，前面有個扶手電梯上去~
呢間係新開的日式放題
估唔到入面係超級的大~
分為2邊大廳，超級寬落~
我地食頭轉，五點半已經上到去，人未太多
六點後已經差唔多坐滿~
呢度最特別係有個小朋友玩樂天地，而且不係一個角落，係成間房
小朋友叫佢坐定定食2粒鐘真係好難
有左呢個玩樂房，耐唔耐去郁下，玩完再食過，真係幾好
小朋友有地方玩，媽媽們就可以盡情傾計啦~XD
放題同酒店的BUFFET 好似
都有前菜 / 冷凍海鮮 / 沙律吧~
冷凍海鮮質素幾高，SIZE 大隻，而且肉質爽口
不過 REFILL 有D慢，好耐先REFILL 第二轉~
好多日式前菜選擇，八爪魚/螺肉都超級大隻~ 不過醬有D多~
呢度做緊新開優惠
四人同行一人免費，仲送一條薄切活魚
估唔到二百幾蚊的放題，竟然食到薄切活魚呀~
當然，最重要係質素唔差架~雖未至於極度鮮甜，但都有魚的鮮味~
切身方面絕無欺場
件件都大大件，又唔會雪到硬哂
就連腳蟹都好有味道，真心唔錯~
壽司選擇都唔少，朋友話呢個黑松露油甘魚好好食~
而我就鐘情尼個火炙左口~ 經火炙後油脂更豐富，更肥美
卷物方面都有板有眼，靚靚仔仔的
女話芒果蝦好好食
牛油果軟殼蟹卷/芝士鰻魚卷 都唔錯，卷得夠實唔會散
FUSION 得黎味道幾夾~
羊鞍燒得幾到位，薄片式，好香烤肉味
肉熟得黎又唔韌，俾小朋友食都得~
焗扇貝 入面原來放左好多沙律醬去焗
雖然扇貝肉唔係好大粒，不過味道酸酸甜甜，幾得意~
一口牛同樣嫩滑，味道唔會太濃，食到牛味
好開心有炸蒜片一齊食，仲要係脆卜卜的~
串燒方面水準幾好~
牛舌串燒都燒得好好，唔會燒到乾爭爭
望落去都見到好JUICY
燒海蝦
蝦用竹籤串起，方便燒，亦都方便食
蝦好大隻，而且肉質夠哂實淨彈牙
炸物方面，感覺略嫌遜色了
普遍炸物都感覺較乾身
天婦羅粉超厚，亦都好油~
煮物方面就好出色
辣酒煮蜆
蜆 size 夠哂大隻，又鮮甜，辣酒味道唔太濃，唔會蓋過蜆既鮮味
壽喜燒
湯底好甜，好多牛肉，而且牛肉唔韌，亦唔會超多肥膏
入面有好多菜，份量都唔少~
至於飲品方面，呢度真係超多選擇
有咖啡機，熱飲 (當日的菊花薑蜜和西洋菜蜜都好好飲，濃而不太甜)
仲有好多選擇的汽水啤酒櫃，有好少見的 Hoegaarden
甚至梅酒/清酒都係任飲架~
呢度地方好大，所以餐廳放左2部汽水啤酒櫃在2邊廳，方便大家拿取
真係細心
甜品方面
中式甜品有蓮子杏仁茶同黑糖蓮子紅棗茶
杏仁茶好濃香
紅棗茶又唔會好甜，有很香的紅棗味，真心推介，我飲左2碗 XD
西式甜品方面，SIZE 細細，等大家可以食多幾款~
呢度既甜品甜味較得好低，想必是迎合現代人追求健康吧
不過，甜品，還是要有甜的
桂花糕，不夠甜，只會感覺似食膠~@@
我比較愛那個藍莓芝士餅，甜味適中，有香香的芝士味
雪糕方面，唔係用CHEAP CHEAP X 記
而係用上了Movenpick 同Haagen-Dazs
真係爆開心，平時唔捨得食，今次要食番夠本
我揀左Haagen-Dazs 既coffee 味，配上 咖啡機的 American Coffee,
自己整個 affogato，係咪好正呢~
呢度地點方便，食物選擇幾多，地方又夠大，食物水準唔錯
雖然多人但感覺唔會好擠迫
出單都好快，無咩漏單~
加上有個兒樂天地，媽媽們Gathering 就最啱啦~
成班朋友當然都無問題啦~
日悅極尚日式放題
Nichi Etsu Japanese Restaurant
尖沙咀麼地道67號半島中心2樓
電話號碼 : 23118888 / 52962896
如要聯絡本人，請電郵至： smonkichi@hotmail.com
Fanpge : www.facebook.com/smonkich
Instagram : https://instagram.com/smonkichi/
留言
張貼留言